Sojoji a jihar Kaduna sun kai sumame wani daji da ‘yan ta’adda ke zaune, inda suka kashe mutum 5.
Mukaddashin Daraktan Hulda da Jama’a na Rundunar Sojan Najeriya ta 1, Laftanar Kanar Musa Yahaya, ne ya bayyana haka a Wata sanarwa da ya fitar.
Yace “An kashe ‘yan ta’addan 5 ne a wani samame da aka kai a hanyar Kanti-Tantatu da ke dajin Kubusu da kuma yankin tudun Kaso a karamar hukumar Chikun ta jihar. Sojojin sun kuma kwato bindigogi kirar AK 47 guda hudu, mujallu AK 47 guda shida, bindiga 24 kirar 7.62mm, babura uku, adda guda daya, wayar hannu biyu da wasu layu na tsafi”
Babban kwamandan runduna ta daya kuma kwamandan rundunar hadin gwiwa ta Operation Whirl Punch Manjo Janar Taoreed Lagbaja ya bayyana gamsuwa da yadda sojojin ke gudanar da ayyukansu tare da yabawa jajircewarsu a yayin aikin.
Ya kuma bukaci dukkan ‘yan kasa masu bin doka da oda da su ci gaba da tallafa wa sojoji da sauran jami’an tsaro da sahihan bayanai masu inganci da za su taimaka wajen yaki da masu aikata laifuka.”
