Rundunar yansandan jihar Kano ta ce ta kama wani riƙaƙƙen dillalin kwaya da ta daɗe tana nema ruwa a jallo tare da wasu mutum takwas.
Wata sanarwa da kakakin rundunar, SP Abdullahi Kiyawa ya fitar a yau Litinin, ta ce sun yi nasarar kama Sadam Mu’azu, wanda aka fi sani da Badoo, bayan ƙorafe-ƙorafen da mazauna unguwar Takuntawa suka kai mata.
Ta ƙara da cewa dakaru sun kama ƙarin mutum takwas daga cikin yan tawagar matashin mai shekara 33, waɗanda ke samun tabar wiwi daga kudancin ƙasar nan kuma yake rarraba wa mutane har da matan aure a gidaje.
Rundunar ta ce ta ƙwace ƙunshi 11 na abin da take zargin tabar wiwi ce da gatari da babura biyar da ake amfani da su wajen rarraba kayan da kuma kuɗi Naira dubu 111 da 500 da ga hannunsu.
Ta ce za a gurfanar da su a gaban kotu da zarar an kammala bincike.
