Wani farin bijimin Bakwalon Sa mai darajar fam 1,500 a ƙasar Bangladesh, wanda aka yi wa laƙabi da “Donald Trump” saboda irin gashin kansa mai launin zinariya da ba kasafai ake gani ba, ya zama abin jan hankali a kafafen sada zumunta.
Bijimin, wanda ke rayuwa a wata gona kusa da birnin Dhaka, ya jawo tarin baƙi masu son ganin yadda yake saboda kamanninsa na daban.
Mai dabbar ya bayyana cewa ɗan uwansa ne ya sanya mata sunan “Donald Trump” cikin wasa saboda irin gashinta na musamman.
Mutane da dama daga yankin suna ci gaba da zuwa gonar domin kallon dabbar, musamman bayan ta yi fice a shafukan sada zumunta.
Sai dai duk da wannan shahara da ta samu, an shirya yanka bijimin nan da kwanaki masu zuwa a matsayin layyar Eid al-Adha kamar yadda addinin Musulunci ya tanada a Bangladesh.
A ƙasar Bangladesh, ana yanka miliyoyin dabbobi a lokacin Babbar Sallah a matsayin wani ɓangare na ibadar addini.
Mai dabbar ya ce zai yi kewarta, amma yana kallon yankarta a matsayin cika umarnin addini.
About the Author
