Majalisar Dokokin Najeriya na nazarin wani ƙudirin gyaran kundin tsarin mulki da zai samar da ƙarin kujeru 74 na musamman ga mata a Majalisar Dattawa da ta Wakilai.
Shugaban masu rinjaye na Majalisar Dattawa, Sanata Opeyemi Bamidele, ya bayyana hakan ranar Litinin yayin taron makon shari’a na ƙungiyar lauyoyi mata ta ƙasa (FIDA) a Jihar Ekiti.
Bamidele ya ce ƙudirin ya tanadi ƙarin kujeru 37 a Majalisar Dattawa da 37 a Majalisar Wakilai, inda kowace jiha da Babban Birnin Tarayya Abuja za su samu kujera ɗaya a kowace majalisa.
Ya ƙara da cewa ana kuma shirin samar da ƙarin kujeru uku na mata a kowace Majalisar Dokokin Jiha.
A cewarsa, tsarin zai ɗauki shekaru 16, kwatankwacin wa’adin zaɓe huɗu, kafin a sake nazarinsa.
Sanatan ya bayyana cewa manufar ƙudirin ita ce ƙara yawan mata a harkokin siyasa da shugabanci, ba tare da rage kujerun da ake da su a halin yanzu ba.
Sai dai ya ce sai an samu amincewar da kundin tsarin mulki ya tanada daga Majalisar Ƙasa da majalisun dokokin jihohi kafin ƙudirin ya zama doka.
About the Author
