Aminu Abdullahi Ibrahim
Cibiyar wasanni da motsa jiki ta Kano Stars Sports and Fitness Centre ta sanya fitilun titin da ke amfani da hasken rana a layuka 21 da ke unguwar Shagari Quarters a Kano, tare da gyara ofishin ’yan sa-kai, domin inganta tsaro da walwalar al’umma.
Shugaban cibiyar, Alhaji Musa Aliyu Hassan, wanda aka fi sani da Sarkin Matasan Arewa, Kuyan Banan Ƙasar Hausa, ne ya jagoranci wannan shiri a matsayin wani ɓangare na gudummawar cibiyar ga al’ummar da take gudanar da ayyukanta a cikinta.
A cewar sanarwar da cibiyar ta fitar a ranar 14 ga Oktoba, 2026, ana sa ran fitilun za su ƙara haskaka titin da dare, inganta ganin hanya ga masu tafiya tare da rage haɗarin tsaro da ka iya tasowa sakamakon duhu.
Haka kuma, cibiyar ta gyara ofishin ’yan sa-kai da ke unguwar, domin inganta yanayin wurin da jami’an tsaron sa-kai ke gudanar da ayyukansu.
Da yake magana a madadin mazauna Shagari Quarters, Malam Sulaiman Umar Jalo, wanda ya kafa kuma ya taɓa jagorantar ƙungiyar ci gaban matasa ta unguwar, ya nuna godiya ga shugabanci da ma’aikatan cibiyar bisa wannan tallafi.
Jalo ya ce hasken tituna na da muhimmanci wajen inganta tsaro, domin yana taimaka wa mazauna unguwa su riƙa zirga-zirga cikin kwanciyar hankali da dare. Ya kuma yaba wa cibiyar bisa fahimtar cewa ci gaban al’umma na buƙatar haɗin gwiwar gwamnati, kamfanoni masu zaman kansu da sauran masu ruwa da tsaki.
Cibiyar Kano Stars Sports and Fitness Centre ta ce za ta ci gaba da gudanar da ayyukan wasanni da motsa jiki, tare da neman hanyoyin tallafa wa tsaro, ci gaban al’umma da samar da muhalli mai lafiya.
About the Author
