Asusun Ba da Lamuni na Duniya (IMF) ya yi gargaɗi kan yadda bunƙasar fasahar Artificial Intelligence (AI) za ta iya sauya kasuwar ayyukan yi a duniya, ciki har da maye gurbin wasu ayyukan da mutane ke gudanarwa a halin yanzu.
Fasahar AI na iya sauya yadda ake gudanar da ayyuka a fannoni daban-daban, tare da samar da sababbin damammakin aiki, inganta ƙwarewa da kuma rage buƙatar ma’aikata a wasu guraben aiki.
Sai dai, AI ba wai barazana ce kawai ga ayyukan yi ba, domin tana da damar bunƙasa tattalin arziki, sauƙaƙa gudanar da ayyuka da kuma samar da sabbin hanyoyin kasuwanci da sana’o’i.
Babban ƙalubalen da ke gaban ma’aikata a wannan zamani shi ne yadda za su sabunta iliminsu da ƙwarewarsu domin dacewa da sauyin da fasahar ke kawowa.
Ɗaya daga cikin muhimman ƙwarewar da ake buƙata a wannan fanni ita ce sanin yadda ake amfani da AI yadda ya kamata, musamman dabarun tsara umarnin da ake ba manhajojin AI domin samun amsoshi masu inganci, wato Prompt Engineering.
Haka kuma, ya kamata a fahimci cewa manhajojin AI da ke amsa tambayoyi da samar da bayanai, ƙaramin ɓangare ne kawai na wannan fasaha. AI ta ƙunshi fannoni da dama, ciki har da Machine Learning, Deep Learning, Robotics, Computer Vision da Expert Systems.
Binciken fasahar AI ya samu gagarumin ci gaba tun taron Dartmouth na shekarar 1956, inda aka fara amfani da kalmar Artificial Intelligence a matsayin fannin bincike mai zaman kansa.
Masana na ganin cewa, yayin da AI ke ƙara samun karɓuwa, amfani da ita zai zama muhimmin ɓangare na kusan kowane fanni na aiki da kasuwanci.
Saboda haka, abin da ya kamata mutane su mayar da hankali a kai ba wai tsoron AI kawai ba ne, illa koyon yadda za su yi amfani da ita wajen inganta ƙwarewarsu da ƙara samun damammaki.
About the Author
