Hukumar dakile yaɗuwar cututtuka ta ƙasa NCDC, ta bayyana damuwa kan yadda mace-macen da cutar zazzabin Lassa ke haddasawa ke ƙaruwa a faɗin ƙasar, inda ta danganta hakan da jinkirin neman magani da kuma rashin zuwa Asibiti da wuri.
A cikin sabon rahoton mako na 18 na shekarar 2026, wanda ya shafi tsakanin 27 ga Afrilu zuwa 3 ga Mayu, hukumar ta ce mutane 191 sun mutu sakamakon cutar tun daga farkon shekarar nan.
Rahoton ya nuna cewa adadin mace-macen ya kai kashi 24.6 cikin ɗari, idan aka kwatanta da kashi 19.2 cikin ɗari a irin wannan lokaci a shekarar 2025.
Hukumar ta ce yawan waɗanda aka tabbatar sun kamu da cutar ya ƙaru daga mutum tara a mako na 17 zuwa mutum 22 a mako na 18, inda aka samu sababbin masu cutar a jihohin Ondo, Edo da Plateau.
Rahoton ya kuma bayyana cewa jihohi 23 da ƙananan hukumomi 106 sun samu tabbatattun masu cutar a shekarar 2026.
Jihohin Bauchi, Ondo, Taraba, Benue da Edo ne suka fi yawan masu kamuwa da cutar, inda suka kai kashi 84 cikin ɗari na dukkan masu cutar a ƙasar.
A cewar hukumar, matasa masu shekaru tsakanin 21 zuwa 30 ne suka fi kamuwa da cutar, yayin da aka kuma samu karin ma’aikacin lafiya guda ɗaya da ya kamu da cutar.
About the Author
