Kwamitin Majalisar Wakilai mai kula da harkokin zabe ya bukaci Hukumar Zabe ta Kasa, INEC, ta duba rajistar mambobin jam’iyyun siyasa tare da hana ’yan takarar zaben 2027 wadanda ba sa cikin jerin sunayen rajistar da jam’iyyun suka gabatar wa hukumar.
Shugaban kwamitin, Bayo Balogun na jam’iyyar APC, ya yi kiran ne a wata sanarwa ranar Talata, inda ya ce hukuncin Kotun Koli kan wasu sassa na Dokar Zabe ta 2026 ya kamata a aiwatar da shi a kan dukkan jam’iyyun siyasa.
Ya ce Kotun Koli ta yanke hukunci a ranar 24 ga watan Satumba, inda ta soke hukuncin Kotun Daukaka Kara da ya ayyana wasu daga cikin tanade-tanaden dokar a matsayin wadanda suka saba wa kundin tsarin mulki.
A cewarsa, Kotun Koli ta tabbatar da cewa sashe na 77(5), 77(6) da 77(7) na Dokar Zabe ta 2026 ba su saba wa Kundin Tsarin Mulkin Najeriya na 1999 ba.
Sashe na 77(5) ya tanadi cewa mambobin jam’iyya wadanda sunayensu ke cikin rajistar mambobin da aka gabatar wa INEC ne kadai za su iya kada kuri’a ko tsayawa takara a zaben fidda gwani, tarukan jam’iyya da babban taron jam’iyya.
Balogun ya kuma ce sashe na 77(6) ya bukaci jam’iyyun siyasa su yi amfani da rajistar mambobin da suka gabatar wa INEC wajen gudanar da irin wadannan ayyuka.
Ya bukaci INEC ta gaggauta binciken rajistar mambobin jam’iyyun siyasa domin tabbatar da cewa sunayen ’yan takarar da jam’iyyun suka gabatar suna cikin rajistar da aka mika wa hukumar.
“Wannan zai zama babban gwaji ga hukumar. Duk jam’iyyar siyasa da ’yan takarar da aka samu suna da laifi ya kamata a hana su shiga zaben,” in ji Balogun.
Ya ce aiwatar da dokar yadda ya kamata zai taimaka wajen rage rikice-rikicen da ka iya tasowa daga zargin saba ka’idojin zabe, tare da rage yawan shari’o’in da za su iya biyo bayan zaben 2027.
About the Author
