Rahotanni na cewa ƙungiyar ƙwallon ƙafa ta Manchester United na shirin sallamar kocinta, Michael Carrick, sakamakon rashin kyakkyawan sakamakon da ƙungiyar ke samu a gasar Premier League ta bana.
Manchester United ta shiga hutun wasannin ƙasashe tana matsayi na 18 a teburin gasar, wanda ke cikin rukunin ƙungiyoyin da ke fuskantar barazanar faɗuwa zuwa mataki na gaba, bayan da ta tashi 4-4 da Aston Villa a filin wasa na Old Trafford ranar Lahadi.
Duk da cewa mahukuntan ƙungiyar sun ce har yanzu ba su yanke hukuncin sallamar Carrick ba, wasu majiyoyi sun shaida wa jaridar The Athletic cewa tuni aka fara nazarin waɗanda za su iya maye gurbinsa.
Ana sa ran za a yanke hukuncin sauya kocin kafin wasan da Manchester United za ta je Anfield domin karawa da Liverpool nan da kwanaki 13.
Rahoton ya ce kocin tawagar ƙasar Amurka, Mauricio Pochettino, na cikin waɗanda ake ganin za su iya samun kulawa sosai, yayin da tsohon kocin Newcastle United, Eddie Howe, da Julian Nagelsmann, wanda ya jagoranci tawagar Jamus a baya-bayan nan, su ma ke cikin waɗanda wasu jami’an ƙungiyar ke sha’awa.
Sai dai duk wani hukunci na ƙarshe kan makomar Carrick zai bukaci amincewar Sir Jim Ratcliffe, wanda ke da hannun jari a ƙungiyar, da kuma iyalan Glazer da ke da rinjayen hannun jari.
Matsayin Carrick ya fara fuskantar barazana tun makonnin da suka gabata, bayan da Manchester United ta samu nasara sau ɗaya kacal a wasanninta na farko 10 na Premier League, yayin da a dukkan gasa ta samu nasara sau uku kacal.
Bayan da Bournemouth ta doke United da ci 3-0 a Old Trafford a watan Oktoba, mahukuntan ƙungiyar sun yanke shawarar ba Carrick da ’yan wasansa ƙarin lokaci domin su gyara al’amura.
Sai dai a wasanni uku da suka biyo baya, United ta samu nasara sau ɗaya kacal, a karawar da ta yi da Roma a gasar Zakarun Turai.
An naɗa Carrick a matsayin babban kocin Manchester United na dindindin a watan Mayun 2026, bisa yarjejeniyar shekaru biyu, bayan da ya taka rawar gani a lokacin da yake riƙe da muƙamin rikon kwarya.
Ya karɓi ragamar ƙungiyar ne a watan Janairu bayan sallamar Ruben Amorim, a lokacin da United ke matsayi na bakwai a teburin Premier League.
A ƙarƙashin jagorancinsa, ƙungiyar ta samu maki 39 a wasanninta 17 na ƙarshe, abin da ya taimaka mata kammala kakar wasa a matsayi na uku.
A wancan lokaci, babu wata ƙungiya da ta samu maki fiye da Manchester United a gasar, inda ta doke manyan ƙungiyoyi irin su Manchester City, Arsenal, Liverpool da Chelsea.
Sai dai wannan bajintar ba ta ci gaba ba a kakar wasa ta bana, inda United ta yi nasara sau ɗaya kacal a wasanninta 10 na farko na Premier League, sannan Brighton & Hove Albion ta fitar da ita daga gasar Carabao Cup.
About the Author
