Matashin dan asalin Kano, Saleem Top, ya ci gaba da samun karbuwa a matsayin daya daga cikin fitattun masu kirkirar abubuwan ilmantarwa na addini a kafafen sada zumunta a Najeriya.
Saleem Top ya shahara ne ta hanyar gabatar da sakonnin addini da na tarbiyya a shafukan TikTok da Facebook, inda dubban mutane ke bibiyar shirye-shiryensa saboda salon gabatar da bayanai cikin sauki da fahimta.
A cikin ‘yan shekarun nan, matashin ya zama sananne musamman a tsakanin matasan Arewa, inda masu bibiyar harkokin sada zumunta ke bayyana shi a matsayin daya daga cikin masu tasiri a fannin kirkirar abubuwan Hausa masu ilmantarwa.
Rahotanni sun nuna cewa Saleem Top ya tara dimbin mabiya a shafukan Facebook da TikTok, lamarin da ya kara daga martabarsa a cikin jerin masu tasiri a kafafen sada zumunta.
Da yake jawabi a wata hira, Saleem Top ya ce babban burinsa shi ne amfani da kafafen sada zumunta wajen ilmantar da matasa da kuma yada sakonnin da za su amfani al’umma.
Ya kuma bukaci matasa da su yi amfani da kafafen sada zumunta ta hanyoyin da za su taimaka wajen gina rayuwarsu da kuma bunkasa al’umma.
Masana harkokin kafafen zamani na ganin cewa nasarar da Saleem Top ke samu na nuna yadda matasan Arewa ke kara amfani da kafofin sadarwa wajen gina suna da kuma yin tasiri a wannan zamani.
About the Author
