Kungiyar kwallon kafa ta Barcelona ta fice daga gasar cin kofin zakarun turai UEFA Champions, bayan rashin nasara a hannun Bayern Munici da ci 3_0.
Wasan dai ya gudana a wannan rana ta Laraba, a filin wasa na Spotify Camp Nou da ke kasar Sifaniya.
Dan wasa Sadio Mane ne ya fara zura kwallon farko a minti na 10 da wasan, bayan samun taimako daga hannun dan wasa Serge Gnabry.
Sai dai kuma dan wasa Eric Maxim Choupo-Moting ya kara kwallo ta biyu a minti na 35, bayan da ya samu taimako daga Serge Gnabry.
Shima dan wasa Benjamin Pavard ya zura kwallo ta uku a minti na 95 bayan karin lokaci da alkalin wasa yayi.
Amma wasan an kammala 3-0 tsakanin kungiyoyin guda biyu, wato Barcelona da kuma Bayern Munich.
Yanzu haka dai Barcelona ta fice daga gasar cin kofin zakarun turai ta kakar wasannin shekarar 2022/2023.
Wanda kawo yanzu tana da maki 4 a wasanni biyar da ta buga a rukunin B na gasar.
Kawo yanzu kungiyar Barcelona ko tayi nasara a wasan karshe na rukunin B da zata kece raini da Viktoria Plzen a ranar 1 ga Nuwambar da muke ciki, to Kungiyar ba zata ci gaba da buga gasar ba.
Inda a yanzu ta tabbata Barcelona ta koma gasar Europa League mai daraja ta biyu ta nahiyar turai.
Rukunin B dai Bayern Munich ce a mataki na farko da maki 15 bayan buga wasa biyar.
Sai kuma Inter Milan tana mataki na biyu da maki 10 a wasa biyar din da ta fafata.
Haka kuma Barcelona tana mataki na uku da maki hudu, yayin da Viktoria Plzen ta ke a mataki na karshe a rukunin kuma ba tada maki ko daya.
