Rundunar ’yan sandan jihar Yobe ta kama wani yaro ɗan shekara tara bisa zargin cinna wa gidan mahaifinsa wuta a Rugan Badali, ƙaramar hukumar Karasuwa, lamarin da ya yi sanadin mutuwar matan mahaifinsa biyu da ƙananan ’yan uwansa biyu.
Lamarin ya faru ne a ranar 21 ga watan Agustan 2026, bayan gobarar ta kama gidan da waɗanda abin ya shafa ke ciki, inda suka kone har lahira, rundunar ta ce bincike ya nuna cewa yaron ne ake zargin ya kunna wutar.
A cewar ’yan sanda, yaron ya amsa cewa ya aikata hakan ne domin ɗaukar fansa bayan mahaifinsa ya yi masa duka saboda zargin satar kaza, rahotanni sun ce washegari bayan dukan, yaron ya sayi ashana da Naira 50, sannan ya cinnawa gidan wuta yayin da matan mahaifinsa da ’yan uwansa ke barci.
Yaron ya ce bayan da wutar ta kama gidan, ya yi ihu domin neman taimako, amma bai bayyana cewa shi ne ya kunna wutar ba sai bayan wasu kwanaki, lokacin da ya amsa laifin, daga bisani ’yan sanda suka kama shi tare da mahaifinsa, Abubakar Idi.
Rundunar ’yan sandan Yobe ta ce binciken lamarin ya kusa kammala, kuma za’a miƙa yaron ga hukumomin da suka dace domin ɗaukar matakin da doka ta tanada.
About the Author
