Mukhtar Yahya Usman
Shugaban Rukunin Kamfanonin BUA, Abdussamad Isyaku Rabiu, ya yi wa ‘yan Najeriya alƙawarin cewa kamfaninsa ba zai ƙara farashin kayayyakinsa ba a lokacin azumin Ramadan.
Wakilin BUA na Arewacin Najeriya, Muhammadu Adakawa ne ya bayyana hakan ga manema labarai a Kano a lokacin da yake jawabi game da ƙarin farashin da wasu kamfanoni suka yi a kayayyakinsu.
Kamfanin BUA zai ci gaba da siyar da kayayyaki a farashinsu na yanzu a lokacin Ramadan, kamar yadda Adakawa ya faɗa.
Adakawa ya ce a kwanan nan wasu kamfanoni sun ƙara naira N1,500 akan buhun sukari amma ya ce BUA ba zai yi haka ba.
“A bana, Hukumar Gudanarwa ta Rukunin Kamfanonin BUA ta ga yana da muhimmanci ta saurari tare da amsa kiran abokan ciniki cewa kada wannan kamfani ya ƙara farashin kayayyakinsa musamman sukari.
“Saboda haka, Hukumar Gudanarwar ta umarce ni da in sanar da jama’a cewa ba za a ƙara farashin kaya ba a yanzu har ma cikin Ramadan”, in ji shi.
