Yayin da wa’adin haramta karbar tsaffin kudi da bankin kasa CBN ya sanya ke karatowa, takardar Naira ta fara farfadowa a kasuwannin canji na bayan fage.
Shugaban kungiyar yan canjin na kasa wato ABCON, Alhaji Aminu Gwadabe ne ya bayyana hakan, a zantawarsa da kamfanin dillancin labarai na kasa NAN a Lagos.
Ya alakanta hakan da raguwar bukatar takardun kudin na ketare, inda yawancin mabukata canjin suka koma sayen kadarori maimakon sauyin kudi.
To sai dai hakan ya haddasa ninkuwar farashin kayayyakin, inda Tan din sobo na naira dubu 500 ya koma miliyan 1.
Gwadabe ya kuma ce jita jitar da aka yada kan yuwuwar dakatar da karbar dalolin da aka buga kafin 2021, ta taimaka wajen rage rubdugun da akayi mata.
NAN ta rawaito cewa a jiya Laraba, an ci kasuwar dala akan naira 790, sabanin 900 a yammacin juma’ar da ta gabata.
