Ɗan takarar gwamnan jihar Gombe a ƙarƙashin jam’iyyar PDP, Khamisu Ahmed Mai lantarki, ya ayyana kansa a matsayin wanda ya lashe zaɓen fidda gwani na jam’iyyar da aka gudanar a ranar Talata, tare da bayyana aniyarsa ta sake shigar da ƙara a kotu kan tsohon Ministan Sadarwa, Farfesa Isa Ali Pantami.
Matakin na Mai lantarki ya zo ne bayan jam’iyyar PDP ta sanar da cewa Pantami ne ya lashe zaɓen fidda gwanin, inda ya samu ƙuri’u 2,054, yayin da Mailantarki ya samu 389, sannan Usman Aliyu Garry ya samu ƙuri’u 112.
Zaɓen dai ya biyo bayan hukuncin babbar kotun tarayya da ke Gombe, wadda a ranar 24 ga Satumba ta soke zaɓen fidda gwani na farko da ya samar da Pantami a matsayin ɗan takarar jam’iyyar, tare da umartar PDP da ta sake gudanar da zaɓen cikin kwanaki 30.
Kotun ta bayyana cewa tsarin zaɓen farko bai bi ƙa’idojin jam’iyyar da dokokin zaɓe ba, lamarin da ya hana wasu ’yan takara da aka tantance damar shiga takarar.
Mai lantarki ya kuma nuna cewa ba zai amince da abin da ya kira rashin bin ƙa’ida ba, inda ya sha alwashin komawa kotu domin ƙalubalantar sakamakon zaɓen da kuma rawar da Pantami ya taka a cikinsa.
Yayin da ake jiran matakin shari’a na gaba, rikicin na ƙara jefa zaɓen fidda gwani na PDP a Gombe cikin ruɗani, a daidai lokacin da jam’iyyar ke ƙoƙarin warware matsalolin cikin gida gabanin zaɓen gwamnan jihar na shekarar 2027.
About the Author
