Hafsat Bello Bahara
Hukumar kididdiga ta kasa NBS ta ce ma’aunin tattalin arzikin kasa ya karu da kaso 3.54 a watanni shidan farkon wanna shekara.
Wannan na kunshe cikin wani jawabi da shugaban hukumar Prince Seminu Adeniran ya fitar a ranar juma’a a birnin tarayya Abuja.
Mista Adeniran ya ce a watannin shidan farko na wannan shekarar ma’ aunin arzikin kasa ya kai kimanin naira triliyan 45 da biliyan 32 wanda ya karu da kaso 15 cikin dari akan adadin Idan aka kwatanta da bara.
Mista Adeniran ya kara da cewar a wannan karon an samu raguwar cinikin danyan manfetur saboda karuwar fashinsa da bata gari ke yi ta hanyar fasa bututun mai.
“A shekarar da ta gabata akan samar da ganga miliyan 1 da dubu 61 a kowace rana a wannan karon ansamu ganga miliyan daya da dubu 43 a kowace rana.”
Mista Adeniran ya kuma bayyana cewar kafafan sadarwa, cinikayya, sufuri, noma da kirkira ne suka taimaka wajen samun karuwar adadin ma’aunin tattalin arzikin a wannan karon.
