Wani rahoto da jaridar Vanguard ta wallafa a ranar 22 ga Oktoba, 2026, ya bayyana cewa jihohin Benue, Kebbi, Nasarawa, Plateau, Taraba, Zamfara da Yobe sun amince da kudirin, yayin da Borno, Katsina, Bauchi, Adamawa, Kano da Jigawa ke ci gaba da nazari kan batun.
Kudirin, wanda majalisar dokoki ta kasa ta aika wa majalisun dokokin jihohi, na neman sauya kundin tsarin mulkin Najeriya na shekarar 1999 domin bai wa jihohi damar kafa nasu rundunonin ’yan sanda.
Masu goyon bayan tsarin sun bayyana cewa kafa ’yan sandan jihohi zai taimaka wajen tunkarar matsalolin tsaro, saboda jami’an da za’a ɗauka za su fi sanin yankunansu, harsunansu da al’ummomin da suke yi wa hidima.
Sai dai ana kuma buƙatar samar da ingantattun dokoki da tsarin sa ido domin hana amfani da rundunonin wajen zaluntar jama’a ko cimma muradun siyasa.
A Najeriya, sauya kundin tsarin mulki na buƙatar amincewar aƙalla majalisun dokokin jihohi 24 cikin 36 kafin a cika sharadin da kundin ya gindaya na ci gaba da aikin sauyin dokar.
Rahotannin sun nuna cewa jihohi suna matakai daban-daban wajen nazarin kudirin, kuma amincewar majalisa kaɗai ba ta nufin an riga an kafa rundunar ’yan sandan jihar ko ta fara aiki.
About the Author
