Hukumar Yaki da Masu Yi Wa Tattalin Arziki Ta’annati ta Najeriya (EFCC) ta sake gurfanar da tsohon shugaban kwamitin gudanarwa na tsohon bankin Skye Bank Plc, Tunde Ayeni, a gaban Babbar Kotun Tarayya da ke Apo a Abuja kan zargin karkatar da kudade da suka kai Naira biliyan 15.6.
A cewar EFCC, an sake gurfanar da Ayeni ne bayan da aka yi wa takardun karar gyara daga tuhume-tuhume 17 zuwa 18 sakamakon samun karin hujjoji a binciken da ake yi. Ana zarginsa da laifukan cin amana, karkatar da kudade da kuma amfani da kudaden masu ajiya ba bisa ka’ida ba yayin da yake shugabantar bankin.
Takardun tuhumar sun nuna cewa Ayeni ya karkatar da daruruwan miliyoyin nairori zuwa asusun wasu kamfanoni daban-daban, ciki har da Naira miliyan 510 da aka tura zuwa wani asusun kamfani mai suna Capital Field Investment Group Limited da kuma Naira miliyan 600 zuwa Harigold Ventures Limited. EFCC ta ce wadannan mu’amaloli sun saba wa dokoki da ka’idojin gudanar da banki. Haka kuma, a cikin wasu tuhume-tuhumen da aka gabatar a baya, ana zargin Ayeni da karkatar da sama da Naira biliyan 3.2 zuwa asusun wani kamfani da kuma Naira biliyan 5.08 zuwa wani asusun daban, lamarin da EFCC ta ce ya saba wa ka’idojin banki da dokokin kasa.
Bayan an karanta masa sabbin tuhume-tuhumen, Ayeni ya musanta laifukan da ake tuhumarsa da su. Ana sa ran kotu za ta ci gaba da sauraron shari’ar domin tantance hujjojin da bangarorin biyu za su gabatar.
Wannan shari’a na daga cikin manyan shari’un da EFCC ke bi domin tabbatar da gaskiya da rikon amana a bangaren hada-hadar kudi da bankuna a Najeriya.
About the Author
