Shehu Usman Salihu
Cibiyar bayar da horon sana’o’i ta SKH Vocational Training Development dake Kano, ta shirya bayar da horon kananan sana’oin dogaro dakai kyauta ga matasa 150, la’akari da matsin tattalin arzikin da yayi katutu tsakanin matasa.
Wannan dai bangare ne na tagomashin ranar matasa ta duniya da akai bikinta a juma’ar da ta gabata.
A zantawar ta da Premier radio cikin shirin matasa a premier na yammacin asabar din nan, shugabar kungiyar Haulat kabir Aliyu, ta ce halin matsin rayuwa da ake ciki hadi da rashin ayyukan yi tsakanin matasa, shi ne ya sanya su samar da shirin.
“Da naira 500 mutum zai iya fara sana’ar hada turaren kamshi dana fesawa a jiki ko daki ko sunadarin wanki da wanka, shi yasa zamu koyar da su kananan sana’o’i makamantan wadan nan” a cewar Haulat Kabir
Haulat Kabir ta kara da cewa “cikin makonni hudu zamu koyar da su, kuma su koya su dogara da kansu”.
A kowace shekara dai majalisar dinkin duniya kan fitar da take domin yin bikin ranar matasan, taken na wannan shekarar shi ne “bada goyon baya ga matasa’’.
