Shugaban ƙasa Bola Ahmad Tinubu ya zaɓi Dr Olayemi Michael Cardoso a matsayin sabon gwamnan babban bankin ƙasa CBN.
Zai maye gurbin tsohon dakataccen gwamnan babban bankin Godwin Emefiele, da yanzu haka ke gaban kotu kan zargin cin hanci da rashawa da almundahana, zargin da ya musanta.
Dr Cardoso dai shi ne kwamishinan tsara tattalin arziki da kasafin kudi na farko a jihar Lagos lokacin gwamnatin Bola Tinubu, Nadin na wa’adin shekaru 5, a zangon farko, zai biyo bayan amincewar majalisar dattijan ƙasar nan ne
Bayanin hakan na ƙunshe cikin wata sanarwa da kakakin shugaban ƙasa Ajuti Ngelale ya fitar a Juma’ar nan.
Hakan nan sanarwar ta bayyana nadin mutane 4 a matsayin sabbin mataimakan gwamnan babban bankin ƙasa da suka hada da :
1. Mrs. Emem Nnana Usoro (Lagos)
2. Mr. Muhammad Sani Abdullahi Dattijo (Kaduna)
3. Mr. Philip Ikeazor (Anambra)
4. Dr. Bala M. Bello (Taraba)
