Hukumar Hisbah ta samu nasarar kama wasu ’yan mata masu karancin shekaru a tashar motar Sabontiti da ke yankin karamar hukumar Kumbotso.
Babbar jami’ar da ta jagoranci aikin kamen, Malama Rabi Bello, ta ce dimbin ‘yanmatan da ke yawo a gefen titina abun tsoro ne.
Idan za a iya tunawa, a watan Disambar bara, mataimakiyar kwamandar Hisbah bangaren mata, Malama Kulsum Kasim, ta jagoranci wata tawaga, inda aka kwashe mata masu sana’ar tallar dare a wasu titunan kananan hukumomin jihar Kano.
A wancan lokaci an ga yan mata masu talla a kasuwanni, da wuraren shakatawa, da tashar motoci, da garejin kanikanci, da sauran wurare da daddare.
Yayin da suke yaba kokarin da hukumar Hisbah ke yi, ‘yan kasuwa a tashar mota sun yi kira ga iyaye su daina tura yayansu, musamman yan mata zuwa kasuwanni da wuraren ajiye motoci domin saye da sayarwa da dare.