A jiya Lahadi ne aka yi wata ba-ta-kashi tsakanin jami’an ‘yan sanda a jihar Kano da Shugaban Hukumar Karɓar Ƙorafe-ƙorafe da Yaƙi da Cin Hanci ta Jihar Kano, PCACC, Muhuyi Rimingado.
Idan dai ba a manta ba, a watan Yulin bara ne aka dakatar da Muhuyi sakamakon zargin sa da wata badaƙalar kuɗi.
‘Yan sanda sun yi tsinke a gidan Muhuyi Magaji ne dake Yahya Gusau Road da misalin ƙarfe 7:00 na dare.
Mazauna yankin sun tabbatar da mamaye gidan da ‘yan sanda suka yi, suna masu cewa sun ji ƙarar bindiga a lokacin da ‘yan sandan suke ƙoƙarin kama Muhuyi.
“Mun ji ƙarar bindigogi, muka hango jami’an tsaro a kusa da gidan. Da misalin ƙarfe 9:30, muka ji ƙarar tayoyi a lokacin da suke ƙoƙarin su kori wata mota da take fitowa daga gidan”, in ji wani maƙobcin Muhuyi da ya buƙaci a sakaye sunansa.
Sai dai ba a sani ba ko ‘yan sandan sun kama Muhuyi ko kuma a’a.