Aminu Abdullahi Ibrahim
Rahotanni sun ce wasu ’yan bindiga sun sace ɗaliban makarantar Islamiyya guda 14 da malaminsu a ƙauyen Tungan-Bako da ke yankin Pandogari, ƙaramar hukumar Rafi a jihar Neja.
Lamarin ya faru ne a ranar Asabar 31 ga Oktoba, lokacin da ɗaliban ke taimaka wa malaminsu wajen girbin masara a gonarsa.
Kakakin rundunar ’yan sandan jihar Neja, SP Wasiu Abiodun, ya tabbatar da sace ɗalibai 14, tare da cewa rahotannin farko da suka ce an sace kusan mutum 50 ba daidai ba ne.
Sai dai sabon bayanin da shugaban makarantar, Aminu Mallam Bako, ya bayar ya nuna cewa adadin ɗaliban da aka sace na iya kaiwa 15. Ya ce ya umarci yaran su koma gida bayan samun labarin cewa ’yan bindiga na tunkarar gonar.
Ya bayyana cewa yaran sun kusa isa gida, bayan tafiyar kusan kilomita biyu daga gonar, lokacin da suka yi arba da maharan, waɗanda suka yi awon gaba da su.
Harin ya sake jawo hankula kan matsalar tsaro da ke addabar al’ummomin karkara a jihar Neja, musamman manoma da ɗaliban da ke taimakawa iyayensu ko malamansu a gonaki. Ba a tabbatar da cewa an kuɓutar da waɗanda aka sace ba a bayanan da aka samu.
About the Author
