Aƙalla mutane biyar, ciki har da ɗalibai huɗu na Jami’ar Fasaha ta Tarayya da ke Minna da wani direba, sun rasu a wani hatsarin mota da ya shafi ayarin motocin Gwamnan Jihar Neja, Mohammed Umaru Bago.
Hatsarin ya faru ne a ranar Litinin, 26 ga Oktoban 2026, a yankin Gidan Mangoro da ke kan hanyar Minna zuwa Bida, bayan wata motar Toyota Hilux ta ayarin gwamnan ta yi karo da motar da ke ɗauke da ɗaliban.
Rahotanni sun bayyana cewa ayarin motocin na dawowa daga ziyarar ta’aziyya da aka kai wa Sarkin Nupe a Bida lokacin da hatsarin ya faru.
Mutane biyar sun rasa rayukansu, yayin da Darakta Janar na Fadar Gwamnatin Neja, Dauda Chikuba, ya samu raunuka kuma aka garzaya da shi asibiti.
Kakakin rundunar ’yan sandan jihar, Wasiu Abiodun, ya tabbatar da faruwar hatsarin, yana mai cewa an fara bincike domin gano musabbabinsa.
About the Author
