Matasa 20 da aka sace a hanyarsu ta zuwa sansanin horas da masu yi wa ƙasa hidima (NYSC) sun samu damar zaɓar jihar da suke so a cikin jihohin Kudu maso Yammacin Najeriya domin kammala hidimarsu, a cewar rahoton jaridar Punch.
An sace matasan ne a ranar 1 ga Oktoba, 2026, a kan hanyar Owerri zuwa Onitsha, a Jihar Imo, yayin da suke tafiya cikin motocin haya guda biyu mallakar kamfanin Uko Akwa Ibom Motors. Rahotanni sun ce suna kan hanyarsu ta zuwa jihohin Abia da Akwa Ibom domin fara hidimar ƙasa.
Rahotannin sun bayyana cewa masu garkuwa da mutanen sun fara neman kuɗin fansa naira miliyan 50 kan kowane matashi. Sai dai, a cewar Alirat Wahab, ɗaya daga cikin iyayen matasan, bayan roƙon da iyalai suka yi, masu garkuwa da mutanen sun amince su karɓi naira miliyan shida kan kowane mutum.
Bayan kuɓutar da matasan, jaridar Punch ta rawaito cewa an ba su damar zaɓar ɗaya daga cikin jihohin Kudu maso Yamma domin ci gaba da hidimarsu tare da rukunin masu yi wa ƙasa hidima na yanzu.
Sai dai, har zuwa lokacin da aka wallafa rahoton, hukumar NYSC ba ta tabbatar da wannan damar zaɓen jihohi a hukumance ba.
About the Author
