Gwamnatin tarayya ta ce ya zuwa yanzu jihohi 21 ne kawai suka shirya tinkarar cutar Ebola da aka fara samun a Abuja, yayin da jihohi 15 suka kasa ɗaukar matakin da ake buƙata.
Ministan lafiyar ƙasa Farfesa Muhammad Ali Pate ya bayyana haka, lokacin da yake bayani ga taron majalisar tattalin arzikin ƙasa, wanda ya ƙunshi gwamnoni da mataimakin shugaban ƙasa dangane da samun cutar.
Ferfasa Pate ya ce waɗannan jihohi 21 sun yi duk abinda ya dace na kai ɗaukin gaggawa da zaran an samu mai ɗauke da cutar a jihohin su, yayin da ake buƙatar sauran 15 da suka rage da su ƙara ƙaimi.
Ministan ya bayyana haɗin kai tsakanin bangaren masu kula da lafiyar da shugabanni, da bincike a hanyoyin shiga jihohin da gwajin likita da kuma samarda kayayyakin aiki da kuma sadarwa a matsayin manyan batutuwan da ake buƙata.
Pate ya shaidawa taron cewar gwamnatin tarayya na haɗa kai da jihohi wajen ganin sun yi aiki tare, yayin da Cibiyar kula da yaɗuwar cututtuka ke taimakawa jihohin wajen ganin sun yi abinda ya dace.
About the Author
