Hukumar Kula da Ingancin Abinci da Magunguna ta Najeriya, NAFDAC, ta kama kwalaye 17 na wasu abubuwan sha da alluran sauya launin fata da na rage alamomin tsufa, waɗanda ake zargin ba su da rajista.
Hukumar ta kama kayayyakin ne a filin jirgin sama na Malam Aminu Kano da ke jihar Kano.
Kayayyakin da aka kama sun haɗa da alluran da ake amfani da su wajen sa fata ta yi haske da kuma waɗanda ake tallatawa domin rage alamomin tsufa.
Sai dai har yanzu ba a bayyana sunayen kayayyakin, ƙasashen da aka shigo da su daga gare su, ko mutanen da ake zargi da hannu wajen shigo da su ba.
Haka kuma, babu wani bayani a cikin sanarwar da aka samu da ke tabbatar da cewa an gudanar da gwajin da ya nuna kayayyakin na da illa ga lafiya.
Kama kayayyakin na zuwa ne a wani ɓangare na ayyukan NAFDAC na sa ido kan ingancin kayayyakin da ake shigo da su Najeriya.
