Majalisar Tarayyar Najeriya ta sanar da aika ƙudirin gyaran kundin tsarin mulki da zai bai wa jihohi damar kafa rundunonin ƴansandansu ga Shugaba Bola Ahmed Tinubu domin sanya hannu.
Mataimakin Shugaban Majalisar Wakilai, Benjamin Kalu, ne ya bayyana hakan yayin zaman majalisar na ranar Laraba, 4 ga Nuwamba, 2026.
Matakin na zuwa ne bayan majalisun dokokin jihohi 29 daga cikin 36 na Najeriya sun amince da ƙudirin, wanda ya zarce adadin jihohi 24 da ake buƙata domin amincewa da gyaran kundin tsarin mulki.
Ƙudirin na neman bai wa jihohi damar kafa rundunonin ƴansandansu domin inganta tsaro da yaƙi da miyagun laifuka.
Yanzu dai ana jiran matakin da Shugaba Tinubu zai ɗauka kan ƙudirin, wanda zai ba jihohi damar kafa rundunonin ƴansanda mallakinsu idan ya zama doka.
About the Author
