Ministan Babban Birnin Tarayya Abuja, Nyesom Wike, ya ce ba zai sassauta matsin lambar siyasa da yake yi wa tsohon Mataimakin Shugaban Ƙasa, Atiku Abubakar, da tsohon Gwamnan Anambra, Peter Obi, ba.
Wike ya bayyana hakan ne a ranar Juma’a a Abuja, inda ya ce zai ci gaba da zafafa adawa da Atiku da Obi, yana mai cewa ba ya son su samu nutsuwa a fagen siyasa.
Ministan ya bayyana cewa, “aikinsa shi ne ya saka Atiku da Obi hawan jini,” yana mai jaddada cewa zai ci gaba da kalubalantar su a harkokin siyasa.
A wani ɓangare na jawabin nasa, Wike ya ce a halin yanzu babu wata babbar jam’iyyar adawa mai ƙarfi da za ta iya fuskantar jam’iyyar APC yadda ya kamata a matakin ƙasa.
Ya ce jam’iyyar PDP, wadda a baya ta kasance ɗaya daga cikin manyan jam’iyyun adawa a Najeriya, ta rasa tasirinta sakamakon rikicin cikin gida da ya dabaibaye ta.
A cewarsa, rikicin PDP ya raunana matsayinta a siyasar ƙasa, lamarin da ya taimaka wajen rage ƙarfin adawar siyasa da ake da ita a Najeriya.
Wike ya ce wannan yanayi ya nuna cewa rikicin cikin gida na jam’iyyun siyasa na iya yin tasiri kai tsaye kan ƙarfinsu na fuskantar jam’iyyar da ke kan mulki.
About the Author
