Gwamnatin Tarayya ta bayyana cewa ƙudirin dokar kafa rundunonin ’yan sanda na jihohi na dab da miƙa shi ga Majalisar Dokokin Ƙasa domin duba shi da kuma ɗaukar matakin da ya dace.
Shugaban Ma’aikatan Fadar Shugaban Ƙasa, Femi Gbajabiamila, ne ya bayyana hakan a ranar Alhamis, inda ya ce kwamitin da Shugaba Bola Ahmed Tinubu ya kafa ya kammala muhimmin ɓangare na aikin tsara dokar.
Rahotanni sun nuna cewa, majalisun dokokin jihohi sun riga sun amince da gyaran Kundin Tsarin Mulkin Najeriya, amma ana buƙatar aƙalla jihohi 24 daga cikin 36 su amince da gyaran kafin ya samu karɓuwa.
Fadar Shugaban Ƙasa ta kuma bayyana cewa ana ci gaba da tattaunawa da gwamnonin jihohi domin samun goyon bayansu, yayin da aka warware sauran batutuwan da suka rage a cikin ƙudirin dokar.
Ana sa ran miƙa ƙudirin ga Majalisar Dokokin Ƙasa zai buɗe sabon mataki na ƙoƙarin kafa rundunonin ’yan sanda a matakin jihohi.
About the Author
