Babbar Kotun Jihar Kano mai lamba 11, da ke Bompai, ta yanke wa Umar Auwal da Yakubu Dayyabu hukuncin kisa ta hanyar rataya, bayan samunsu da laifin kashe wata mata mai suna Fatima Abubakar da ’ya’yanta shida a unguwar Dorayi Ciranci da ke Kano.
Mai Shari’a Nasiru Saminu ne ya yanke hukuncin a ranar Juma’a, 6 ga Nuwamba, 2026, bayan nazarin shaidu da hujjojin da aka gabatar a gaban kotun.
Kotun ta samu Umar Auwal, wanda aka fi sani da Breaker, da Yakubu Dayyabu, wanda ake wa laƙabi da Wawo, da laifin kashe Fatima Abubakar da ’ya’yanta shida a ranar 17 ga Janairu, 2026.
Sakaakon haka, kotun ta yanke wa kowannensu hukuncin kisa ta hanyar rataya sau bakwai, bisa la’akari da rayukan mutane bakwai da aka kashe.
Haka kuma, kotun ta yanke musu hukuncin ɗaurin rai da rai bisa laifukan haɗa baki da kuma fashi da makami.
Sai dai, kotun ta wanke Isiyaku Yakubu tare da sallamarsa daga zargin haɗa baki wajen kisan mutanen bakwai.
Tawagar masu gabatar da ƙara ta ƙunshi Babban Lauyan Gwamnatin Jihar Kano kuma Kwamishinan Shari’a, Abdulkarim Kabir Maude, tare da Barrister Salisu Muhammad Tahir.
A ɓangaren waɗanda ake ƙara kuwa, Barrister J. I. Musa da Barrister A. I. Baba ne suka jagoranci kare su a gaban kotun.
About the Author
