Hukumar Yaƙi da Cin Hanci da Rashawa ta Najeriya (EFCC) ta zargi tsohon Gwamnan Babban Bankin Najeriya (CBN), Godwin Emefiele, da amfani da wasu mutane wajen sayen kadarorin da darajarsu ta kai biliyoyin naira a lokacin da yake kan mulki.
Wani jami’in binciken hukumar, Alvan Gurumnaan, ya bayyana hakan a gaban Kotun Laifuka ta Musamman da ke Ikeja, Legas, ranar Alhamis, 12 ga Nuwamba, 2026.
Jami’in ya ce binciken EFCC ya gano kadarorin da ake zargin suna da alaƙa da Emefiele a jihohin Legas, Ogun, Delta da kuma Abuja, ciki har da manyan gidaje, gine-ginen kasuwanci da rukunin gidajen zama.
Ya kuma shaida wa kotun cewa hukumar ta gano sama da dala miliyan biyu a ofishin wani lauya mai suna Ifeanyi Omeke, wanda ake zargin ya riƙa karɓar kuɗaɗe a madadin Emefiele.
Sai dai lauyoyin Emefiele da abokin shari’arsa, Henry Omoile, sun ƙalubalanci wasu bayanan da mai gabatar da ƙara ya gabatar, suna cewa ba su da alaƙa da tuhumar da ake yi wa waɗanda suke karewa.
Alƙalin kotun, Rahman Oshodi, ya yi watsi da ƙalubalantar shaidar a wannan mataki, tare da bai wa lauyoyin damar yi wa shaidan tambayoyi yayin ci gaba da shari’ar.
An ɗage shari’ar zuwa ranar Juma’a, 13 ga Nuwamba, 2026.
About the Author
