Hukumar Kashe Gobara ta Jihar Kano ta tabbatar da mutuwar wasu matasa biyu bayan da suka fada cikin wani tafkin a yankin Ring Road Kureken Sani da ke karamar hukumar Kumbotso a jihar Kano.
Sanarwar da Kakakin hukumar Saminu Yusif Abdullahi ya fitar, tace matasan biyu masu shekaru 18, Sadiq Isyaku da Auwal Isyaku, sun fada cikin wani tafkin a ranar litinin
Rahoton farko ya nuna cewa matasan na kokarin tserewa ne daga wasu da ake zargin ’yan kwacen waya ne da ke binsu, inda a kokarinsu na tsira suka fada cikin tafkin.
An ciro su daga ruwan a sume, amma daga bisani aka tabbatar da rasuwarsu. Daga nan aka mika gawarwakinsu ga mahaifinsu Ibrahim Shehu da ke zaune a Unguwa Uku a Kano.
A wani lamari dabam, hukumar kashe gobarar ta ce ta ceto wani mutum mai kimanin shekaru 40, bayan da ya fada cikin wata rijiya a Durumin Zungura kusa da Assahabul Khahafi a karamar hukumar Birni.
Hukumar ta ce ta samu kiran gaggawa daga Abdullahi Aminu da misalin karfe 7:12 na dare ranar Litinin, 9 ga Maris, 2026, wanda ya sanar da cewa wani mutum ya fada cikin rijiya.
Jami’an ceto daga hedikwatar hukumar sun isa wurin da gaggawa, inda suka gano mutumin mai suna Shitu Balarabe a cikin rijiyar. Daga bisani sun samu nasarar ciro shi da rai.
An mika shi ga dan’uwansa Jamilu Balarabe da ke zaune a Durumin Zungura a cikin birnin Kano.
Hukumar kashe gobarar ta jajantawa iyalan wadanda suka rasu tare da kira ga jama’a da su dauki matakan kariya domin kauce wa irin wadannan hadurra.
About the Author
