Shugaban tafiyar Kwankwasiyya, Rabiu Musa Kwankwaso, ya kai ƙara zuwa ga Department of State Services, inda yake zargin wasu manyan jami’an gwamnatin Kano da suka hada da Daraktan Yaɗa Labarai na Gwamna, Sunusi Bature Dawakin Tofa, Mai Ba Gwamna Shawara kan Yaɗa Labarai, Ibrahim Adam—wanda kuma tsohon mai taimaka wa Kwankwaso ne a harkar yaɗa labarai kafin ya sauya sheka—da kuma Salisu Yahaya Hotoro, tare da wasu, da zargin cin zarafi da kai hare-hare ta yanar gizo.
Takardar korafin wadda aka rubuta a ranar 9 ga Afrilu, 2026, ta bayyana cewa an mika ta kuma DSS ta karɓe ta a ranar 10 ga Afrilu, 2026. Ta zargi waɗannan mutanen da gudanar da kamfen na bata suna da kuma kai farmaki a shafukan sada zumunta, musamman Facebook, kan Kwankwaso da magoya bayansa.
Sai dai wannan lamari ya jawo cece-kuce a fagen siyasa, inda masu sharhi ke cewa akwai sauyin yanayi a yaƙin siyasar yanar gizo da ke tsakanin bangarorin biyu.
A baya, magoya bayan Kwankwasiyya sun shahara da yawan wallafa saƙonni masu zafi da sukan kai hari ga gwamnatin Kano ƙarƙashin Gwamna Abba Kabir Yusuf, ta hanyar amfani da kafofin sada zumunta.
Wannan ya haɗa har da kai hare-hare ga jami’an gwamnati, ciki har da kakakin Gwamna, Sunusi Bature Dawakin Tofa, wanda ya sha suka daga ɓangarori daban-daban na siyasa.
Duk da wannan matsin lamba, gwamnatin Yusuf ta kasance tana kaucewa shiga muhawara mai tsawo a kafafen sada zumunta, tana mayar da martani ne ta hanyoyin hukuma.
Masu sharhi na ganin cewa wannan ƙarar na iya nuna sauyin dabarun siyasa a fagen yada labarai, inda bangaren gwamnati ke kara samun karfi a martani da kafafen sada zumunta.
Haka kuma an fi mayar da hankali kan Ibrahim Adam, wanda ya taɓa kasancewa kusa da Kwankwaso a harkar yaɗa labarai kafin daga bisani ya koma cikin gwamnatin Gwamna Yusuf, inda yanzu yake aiki a matsayin mai ba da shawara.
Masu nazari sun ce wannan sauyin sheka na daga cikin abubuwan da ke kara canza yanayin hulɗar siyasar Kano a kafafen yada labarai.
Har zuwa lokacin hada wannan rahoto, babu wata sanarwa daga DSS ko mutanen da ake zargi kan wannan ƙara.
About the Author
