Shugaban kasa Bola Ahmed Tinubu ya aika sunayen karin mutane 32 da ya zaba a matsayin jakadu zuwa Majalisar Dattawa domin tantancewa, kwanaki kadan bayan ya mika sunayen rukuni na farko guda uku.
A cikin wasiku biyu da ya aikawa shugaban majalisar dattawa, Godswill Akpabio, Shugaba Tinubu ya nemi majalisar da ta gaggauta duba da tabbatar da jakadun.
Cikin wadanda aka tura sunayensu har da tsohon shugaban hukumar INEC Farfesa Mahmudu Yakubu daga jihar Bauchi da tsohon hadimin shugaban kasa, Reno Omokri (Delta) sai kuma tsohon ministan sufuri Femi Fani Kayode
A cikin jerin sunayen akwai mata hudu daga cikin jakadu na aiki da kuma mata shida daga cikin wadanda ba na aiki ba.
Daga nan Arewa akwai Yakubu Nyaku Danladi (Taraba), Miamuna Ibrahim Besto (Adamawa), Musa Musa Abubakar (Kebbi), Hamza Mohammed Salau (Niger), Ambasada Shehu Barde (Katsina), Ambasada Ahmed Mohammed Monguno (Borno), Ambasada Muhammad Saidu Dahiru (Kaduna), Ambasada Olatunji Ahmed Sulu Gambari (Kwara),
Ana sa ran za a tura su kasashen da Najeriya ke da kyakkyawar hulda da su, kamar: China, India, Koriya ta Kudu, Canada, Mexico, UAE, Qatar, Afirka ta Kudu, Kenya, da manyan ofisoshi irin su Majalisar Dinkin Duniya, UNESCO, da Tarayyar Afirka. Za a sanar da guraben aikinsu bayan majalisa ta tabbatar da su.
A makon da ya gabata, Shugaba Tinubu ya tura sunayen jakadu uku dan tantancewa Ambasada Ayodele Oke (Oyo), Ambasada Amin Mohammed Dalhatu (Jigawa), da Tsohon Kanar Lateef Kayode Are (Ogun) wadanda ake sa ran za a tura su kasar Birtaniya, Amurka, ko Faransa bayan tantancewa.
About the Author
