Gwamnatin Neja ta dakatar da Hawan Sallah

Gwamnan jihar Neja Umaru Bago ya bayar da umarnin dakatar da Hawan Bariki a da sauran bukukuwan Sallah a dukkan masarautun jihar Neja.

Umurnin ya biyo bayan mummunan bala’in ambaliya da ta yi sanadin asarar rayuka da dukiyoyi a garin Mokwa da kewayenta.

Sakataren gwamnatin jihar Alhaji Abubakar Usman a lokacin da yake mika wannan umarni, ya ce an dauki matakin ne a matsayin girmamawa ga wadanda lamarin ya rutsa da su da kuma ba da damar zaman makoki da addu’o’i a gare su.

Da yake mika umarnin Gwamnan ga Masarautun, Sakataren ya bayyana cewa, ambaliyar Mokwa na daya daga cikin mafi munin annoba da ta afku a jihar tsawon shekaru da dama da suka gabata, wacce ta yi sanadin salwantar rayuka da rugujewar gidaje da ababen more rayuwa da dama.