Tinubu ya mayar da tsohon Shugaban NTA kan mukaminsa

Shugaba Bola Tinubu ya bayar da umarnin mayar da Salihu Abdullahi Dembos, tsohon Shugaban Gidan Talbijin na kasa  NTA da aka sauke kan mukaminsa.

Hakan na kunshe ne a wata sanarwa da mai magana da yawun shugaban ƙasar Bayo Onanuga ya fitar a ranar Talata.

Onanuga  ya ce, Dembos wanda Shugaba Tinubu ya naɗa a watan Oktoban 2023, ya kuma cire, a yanzu zai dawo domin kammala wa’adin mulkinsa na shekara uku.

Haka ma shugaban ƙasar ya bayar da umarnin maido da Mista Ayo Adewuyi a matsayin babban daraktan sashen labarai na NTA, domin shi ma ya ƙarasa wa’adinsa na shekara uku da zai ƙare a 2027.

A ’yan kwanakin nan ne aka sanar da sauke Dembos sakamakon wasu sauye-sauye da aka gudanar da hukumar.

Sauke shi dai ya janyo zazzafar muharawa da suka musamman daga yankin arewacin ƙasar, inda Salihu Abdullahi Dembos ya fito.